Artıq xəbər verildiyi kimi, 15-25 avqust 2024-cü il tarixlərində Moldovanın paytaxtı Kişinyov şəhərində Dünya Armrestlinq Federasiyasının təşkilatçılığı ilə Qol güləşi üzrə 45-ci rəsmi Dünya çempionatı keçiriləcək. Azərbaycan Milli yığması ölkəmizi bu çempionatda 7 idmançı və 1nəfər nümayəndədən ibarət heyətlə təmsil edəcək. Avqustun 14-də Azərbaycan Qol Güləşi Federasiyasının prezidenti Cəsarət Əhmədov federasiyanın baş ofisində yığma komandada yer almış idmançılarla görüşüb. Federasiya rəhbəri idmançılara Azərbaycanı rəsmi Dünya çempionatında ləyaqətlə təmsil etmələri üçün öz tövsiyyələrini verib və onlara uğurlar diləyib. Daha sonra Cəsarət Əhmədov yığma komandanın üzvlərinə yeni idman formalarını təqdim edib.

Qeyd edək ki, Azərbaycan idmançılarının Qol güləşi üzrə 45-ci rəsmi Dünya çempionatında iştirakı və yeni formaların tikilişi üçün tələb olunan bütün xərcləri Cəsarət Əhmədov öz şəxsi vəsaitləri hesabına ödəyib.

İdmançılarımız avqustun 16-da Heydər Əliyev adına Beynəlxalq Hava Limanından təyyarə ilə Moldovaya yola düşəcəklər. Bütün idmançılarımıza uğurlar diləyirik!